Kryeministri Edi Rama ka zhvilluar një takim në Shkodër, ku ka prezantuar kandidatët për zgjedhjet e 11 majit. Rama ka theksuar se lista e PS është gjithëpërfshirëse, duke përfshirë të gjitha moshat dhe kategoritë shoqërore. Ai u shpreh se kjo listë është një skuadër përfaqësuese, që mbulon praktikat dhe ndjeshmëritë e ndryshme të qytetarëve të Shkodrës.

“Në Shkodër, kemi arritur të formatojmë një skuadër që është shumë përfaqësuese, që mbulon praktikisht të gjitha ndjeshmëritë dhe njëkohësisht edhe kategoritë, që u flet të gjithëve, pavarësisht moshës, gjinisë dhe prejardhjes,” tha Rama, duke theksuar se kushdo që jeton në Shkodër apo ka lidhje me këtë qytet, mund të gjejë një përfaqësues të vetin në këtë skuadër.

Në vazhdim, ai e cilësoi këtë si një avantazh të madh, duke shtuar se krahasimisht me kundërshtarët, Partia Socialiste ka horizontin e BE përpara dhe nuk ka “kundërshtarë përballë, por vetëm pas”. Rama përmendi gjithashtu “zhurmën, mallkimet, sharjet, britmat dhe lehjet” që vijnë nga kundërshtarët, duke nënkuptuar se opozita është në një fazë të reagimeve të forta.