Kryetari i Partisë së Lirisë, Ilir Meta, ka shprehur urimet e tij për Talat Xhaferin, i cili pritet të jetë kryeministri i parë shqiptar i Maqedonisë. Në një postim në Facebook, Meta shprehet se Qeveria e re do të kryejë hapa të rëndësishëm në konsolidimin e një procesi zgjedhor të lirë dhe të ndershëm.
Ai shpreh besimin se lidershipi i Xhaferit, i bashkëpunues dhe i gjithpërfshirë, do të kontribuojë në perspektivën e integrimit të Maqedonisë së Veriut në Bashkimin Europian. Ilir Meta përfundon postimin duke theksuar rolin kyç të shqiptarëve në harmoninë ndëretnike, stabilitetin dhe ardhmërinë europiane të Maqedonisë së Veriut.
“Urimet më të përzemërta dhe shumë suksese Qeverisë së re teknike të Maqedonisë së Veriut dhe Kryeministrit të saj, Talat Xhaferi!
Besimplotë se me lidershipin e tij dhe angazhimin e dëshmuar gjithpërfshirës dhe bashkëpunues, pa dallim etnik dhe politik, Qeveria e re do të hedhë hapa të rëndësishëm në konsolidimin e një procesi zgjedhor të lirë dhe të ndershëm, në funksion të perspektivës së integrimit të Maqedonisë së Veriut në Bashkimin Europian.
Shqiptarët, si faktor shtetformues, të orientuar qartë nga BE dhe NATO, kanë një rol kyç për harmoninë ndëretnike, stabilitetin dhe ardhmërinë europiane të Maqedonisë së Veriut”, shkruan Meta.
