Gjatë daljes së tij nga godina e Bashkimit Europian në Luksemburg, kryeministri Edi Rama u përball me një surprizë të këndshme. Një grup emigrantësh shqiptarë kishin qëndruar për disa minuta matanë rrugës, duke pritur rastin për të bërë një foto me të. Ata e përshëndetën me entuziazëm dhe falënderime, duke shprehur shpresën e tyre për progresin e shpejtë të procesit të anëtarësimit të Shqipërisë në BE.

Një nga të pranishmet, një grua, i kërkoi kryeministrit një foto me grupin, ndërsa ai me kënaqësi pranoi dhe pozoi bashkë me ta, duke mbajtur flamurin shqiptar. Pasi realizuan foton, Rama i falënderoi për pritjen e tyre të ngrohtë dhe u largua, i shoqëruar nga ambasadori shqiptar në Bruksel, ndërsa grupi i emigrantëve e përshëndeti me fjalët “urime, urime.”

Ky moment u nda më vonë nga vetë kryeministri në rrjetet sociale, ku postoi një foto të takimit dhe shënoi: “Krenar për Shqipërinë! Në dalje të godinës së Bashkimit Europian, në Luksemburg.”