Pak pas fitores së zgjedhjeve në Himarë nga kandidati socialist Vangjel Tavo për kryetar të Bashkisë së këtij qyteti, ka ardhur dhe reagimi nga Kryeministri Edi Rama. Ai e ka uruar Tavon, duke e cilësuar fitoren e tij për Bashkinë e Himarës si spektakolare.

Kryeministri shprehu gjithashtu kënaqësinë për mbështetjen që himariotët i dhanë Partisë Socialiste, duke përsëritur vendosmërinë për ta kthyer Himarën në një prej destinacioneve më të kërkuara të Mesdheut.

“MIRËMËNGJES dhe me urimin për kryebashkiakun e ri të Himarës për fitoren spektakolare, kënaqësinë e mbështetjes domethënëse për Partinë Socialiste në zgjedhjet e djeshme, si edhe vendosmërinë për ta kthyer #Himarën2030🇦🇱 në një prej destinacioneve më të kërkuara të Mesdheut, ku në radhë të parë të gjithë ata që punojnë në industrinë turistike në Greqi, të kthehen për paga më të mira e për ajrin e pazëvendësueshëm të vendlindjes, ju uroj të gjithëve një javë sa më të qetë,” tha Rama.

Në garën për Bashkinë e Himarës, Tavo arriti të siguronte 1,500 vota më shumë se kundërshtari Petraq Gjikuria. Numërimi i votave përfundoi herët në mëngjes në të 36 qendrat e votimit, duke dhënë rezultatin përfundimtar: 5,022 vota (58.62%) për Tavon kundrejt 3,545 votave (41.38%) për kandidatin opozitar Petraq Gjikuria.