Kryeministri Albin Kurti, gjatë fjalës së tij drejtuar dy Kuvendeve të Shqipërisë dhe Kosovës, ka kërkuar mbështetje nga Shqipëria për integrimin e Kosovës në NATO, duke e cilësuar këtë si një nevojë urgjente përballë sulmeve dhe agresioneve të vazhdueshme që vijnë nga Serbia dhe, sipas tij, edhe nga Rusia.
Në fjalën e tij, Kurti theksoi se agresioni i Rusisë në Ukrainë, rindezja e konflikteve në Lindjen e Mesme, dhe sulmet terroriste që kanë ndodhur në Kosovë, përfshirë ato në Banjskë dhe në kanalin e ujësjellësit në Ibër-Lepenc, kanë bërë që anëtarësimi në NATO të bëhet një çështje urgjente për shtetin e Kosovës.
“Sulmet terroriste ndaj Kosovës, veçanërisht ato në Banjskë dhe në kanalin e ujësjellësit në Ibër-Lepenc, që vijnë nga e njëjta adresë, nga Serbia, e nëse nuk është Serbia është edhe Serbia dhe Rusia bashkë, e kanë bërë këtë çështje urgjente, pra anëtarësimin në NATO”, tha Kurti.
Ai shtoi se, si kurrë më parë, Kosova ka arritur të shtrijë sovranitetin e saj në veri dhe se sulmet terroriste të orkestruara dhe të financuara nga paramilitarë të lidhur me Serbinë janë shprehje të pafuqisë së Serbisë. “Dikur nuk kanë bërë akte terroriste sepse e kishin krejt nën kontroll, tash që e kanë humbur kontrollin, bëjnë akte terroriste. Por ky është fundi i tyre. Aktet e tyre terroriste janë dëshpërimi i tyre, janë fundi i sundimit të tyre”, tha ai.
Kryeministri Kurti theksoi gjithashtu se Kosova nuk ka qenë asnjëherë më e fortë ushtarakisht. Ai theksoi se investimet në vitet 2021-2023 në armatim dhe municion kanë arritur mbi 239 milion euro, një shumë shumë më e madhe krahasuar me 4 milionët që ishin investuar gjatë periudhës 2018-2020. “NATO është në Kosovë, Kosova nuk është ende në NATO, mirëpo Kosova po bën hapa gjigant drejt NATO-s. NATO-ja nuk ka armatim të vetin, e ka vetëm armatimin e shteteve anëtare. Për dallim nga viti 2018-2020, kur kishim më pak se 4 milion investim në armatim, në vitet 2021-2023 kemi mbi 239 milion euro investim në armatim dhe municion”, tha ai.
Kryeministri Kurti theksoi se Kosova nuk ka nevojë të anëtarësohet në NATO vetëm sepse nuk është mjaftueshëm e fortë, por sepse do të bëhet gjithnjë e më e fortë dhe do të kontribuojë në sigurinë e NATO-s. Ai po ashtu theksoi se integrimi në NATO është një hap i domosdoshëm për të garantuar paqen dhe sigurinë e Kosovës dhe rajonit, dhe për të forcuar marrëdhëniet me aleatët strategjikë.
Kurti gjithashtu vuri në dukje lidhjet e ngushta ekonomike midis Kosovës dhe Shqipërisë, duke theksuar se Shqipëria është një nga partnerët kryesorë tregtarë të Kosovës për vitin 2023, me vlerën totale të shkëmbimeve tregtare që arriti në 440 milion euro. “Në vitin 2023, Shqipëria është ndër 5 vendet e para që ka vëllimet më të mëdha të shkëmbimeve tregtare me Kosovën”, tha ai.
Ai theksoi se, ndërsa arritjet janë të rëndësishme, nuk duhet të mburren për to, pasi kanë shumë punë për të bërë jo vetëm për qytetarët e Kosovës dhe Shqipërisë, por edhe për shqiptarët që jetojnë në shtetet fqinje. Kryeministri Kurti foli për diskriminimin e shqiptarëve në Serbi, duke e cilësuar këtë si një nga problemet më të mëdha të rajonit. “Shqiptarët në Serbi janë komuniteti etnik më i diskriminuar në Evropë. Prandaj ata meritojnë vëmendje më të madhe në bashkërendimin e politikave rajonale të Republikës së Shqipërisë dhe Republikës së Kosovës”, tha ai.
Në fund, Kurti njoftoi se qeveria e Kosovës ka ndarë 4 milionë euro për Luginën në buxhetin e vitit të ardhshëm, duke shpresuar që kjo të shërbejë si një shembull edhe për Shqipërinë. “Shqiptarët në Luginë meritojnë më shumë vëmendje dhe mbështetje, dhe ky është një hap i rëndësishëm për të përmirësuar jetën e tyre”, përfundoi ai.
