Kryeministri i Kosovës, Albin Kurti, ka bërë të qartë se Qeveria e tij nuk do të pranojë themelimin e Asociacionit të komunave me shumicë serbe si kusht për anëtarësimin e Kosovës në Këshillin e Evropës (KiE). Në një mbledhje të Qeverisë në Prishtinë, Kurti theksoi se Kosova po ballafaqohet me një kusht të ri, që nuk ka lidhje me procesin e anëtarësimit në KiE.

“Qeveria nuk e pranon kushtëzimin e anëtarësimit në KiE me Asociacion. Për normalizimin e marrëdhënieve me Serbinë, ne bisedojmë në Bruksel, e jo në Strasburg,” deklaroi Kurti.

Pas kërkesës së Francës dhe Gjermanisë për hapa drejt themelimit të Asociacionit, Kurti theksoi se Kosova nuk do të pranojë këtë kusht. Ai gjithashtu shprehu skepticizmin ndaj kërkesës së dërgimit të dokumenteve në Gjykatën Kushtetuese të Kosovës pa pranim zyrtar prej tyre, duke e cilësuar këtë kërkesë si absurde.

“Ne dëgjuam se ka kryeqytete që tash po e kushtëzojnë finalizimin e procesit të anëtarësimit me dërgimin e një dokumenti në gjykatën Kushtetuese të Kosovës…Qeveria e Kosovës nuk mund të dërgojë në Gjykatë Kushtetuese dokumente të cilat nuk i ka pranuar dhe të cilat nuk janë zyrtare. Kjo kërkesë ndaj nesh ka qenë dhe mbetet absurde”, shtoi Kurti.