Kryetari i Partisë së Lirisë, Ilir Meta ka deklaruar ditën e sotme se qeveria shqiptare ka shkatërruar qarkun e Shkodrës nga ana administrative.

Këtë deklaratë Meta e bëri teksa prezantoi kandidatin e opozitës për Malësinë e Madhe, Isa Ramaj. Ai u shpreh se është i sigurt që më 14 Maj Shkodra dhe Malësia e Madhe do të jenë në krye të fitores së madhe të opozitës.

“Ne jemi popull blegtor, po nuk zhvilluam blegtorinë me çfarë do zhvillohemi. Sot nuk gjen dot mish vendi. Paketa e Kosovës për Bujqësinë dhe blegtorinë është fantastike ndërsa këtu braktisja është totalisht e qëllimshme.

Në qarkun më të diskriminuar të Shqipërisë nga kjo qeveri. Flas për Shkodrën. Si mund t’i hiqet Shkodrës drejtoria e Arsimit, drejtoritë e Ujërave, Shkodra është ujëmbledhësi më i madh. Si mund të heqësh arkivat e Shkodrës. Si mund të heqësh drejtorinë e Shërbimit Informativ. Si mund të hiqen të gjithë gjykatat. Ky shkatërrim administrative që i bëri Shkodrës nuk është rastësi.

Jam i sigurt që Shkodra dhe Malësia e Madhe do të jetë në krye të kësaj fitoreje të madhe që po troket me 14 Maj. Nuk kanë më asnjë propozim ata. E vetmja gjë që i ka mbetur është presioni te njerëzit. Ata takohen vetëm me administratën. E duan t’i bëjnë like dhe share dhe të firmosin për korrupsionin e tyre”, deklaroi Ilir Meta.