Një grup tregtarësh ambulantë në qytetin e Laçit kanë dalë sot në protestë përpara ambienteve të Bashkisë së Kurbinit, pasi u është kërkuar që të largohen nga hapësirat ku prej vitesh ushtrojnë aktivitetin e tyre tregtar.

Tregtarët shprehen se vendimi i bashkisë është i menjëhershëm dhe pa ofruar asnjë alternativë tjetër për sistemimin e tyre. Ata theksojnë se ndodhen në kushte të vështira ekonomike dhe se shitjet ambulante janë e vetmja mënyrë për të siguruar jetesën.

“Kam 15 vite që shes rroba në rrugë. Burri është me dializë dhe unë mbaj familjen. Dje më erdhi policia bashkiake dhe më tha ‘hiq rrobat ose do t’i hedhim në kamion’. Nuk kemi përkrahje, nuk kemi zgjidhje,” u shpreh një nga protestueset.

Një tjetër tregtar tha: “Kam 7 vite që shes aty. Paguj 180 mijë lekë qira, por më thonë që kam zënë hapësirë publike. Jam pa ndihmë ekonomike, pa përkrahje. Jetoj vetëm nga shitjet që bëj.”

Të tjerë protestues ngritën shqetësimin për mungesën e alternativave nga ana e pushtetit vendor. “Kam 16 anëtarë në familje, gruan e kam të sëmurë. Bashkia nuk më ka ofruar asnjë mundësi tjetër për të punuar. Ku të shkoj unë me gjithë këta njerëz për të mbajtur?”

Tregtarët i bënë thirrje Bashkisë së Kurbinit që të ndalë largimin e menjëhershëm dhe të nisë një dialog për të gjetur një zgjidhje të përbashkët. Ata paralajmëruan se do të vazhdojnë protestat deri në momentin kur t’u ofrohet një alternativë e drejtë për të punuar.