Kreu i lëvizjes Shqipëria Bëhet, Adriatik Lapaj, u ka bërë thirrje qytetarëve që t’i bashkohen protestës së paralajmëruar më 31 janar, ora 18:00, përpara Kryeministrisë.

Reagimi i Lapajt vjen pas protestës së zhvilluar nga Partia Demokratike, ndërsa ai e cilëson situatën aktuale si një kërcënim serioz për vendin. Sipas tij, ajo që ai e quan “narko-regjim” nuk mund të justifikojë veprimet e tij përmes dhunës, gazit lotsjellës dhe arrestimeve.

“Narko-regjimi që na vjedh është tashmë kërcënim për atdheun dhe duhet ndalur”, shkruan Lapaj në një postim në rrjetet sociale. Ai thekson se përdorimi i forcës ndaj qytetarëve po bëhet gjithnjë e më disproporcional dhe se vjedhja nuk mund të mbrohet me mjete represive.

Lapaj shprehet se durimi i qytetarëve ka arritur kufirin maksimal: “Edhe hajdut, edhe të dhunojnë – kjo nuk mund të tolerohet më”.

Në mesazhin e tij, ai bën thirrje për mobilizim masiv, duke theksuar se protestat nuk duhet të ndalen dhe se pjesëmarrja qytetare është thelbësore për të ndalur, sipas tij, abuzimin me pushtetin.

Protesta e 31 janarit pritet të zhvillohet në një klimë të tensionuar politike, ndërsa organizatorët presin pjesëmarrje të gjerë qytetare.