Lëvizja ‘Shqipëria Bëhet’ ka njoftuar organizimin e një proteste më 20 janar, ora 17:00, në Sheshin Skënderbej, për të kërkuar drejtësi për policin e qarkullimit rrugor, Azbi Hoxha, i cili u hodh nga pallati në rrethana ende të paqarta.

Në thirrjen e saj publike, Lëvizja shprehet se ky rast është një këmbanë alarmi për të gjithë shoqërinë, duke kërkuar që ngjarja të mos kalojë në heshtje dhe të ketë drejtësi të plotë për policin dhe familjen e tij.

“Jeta e një polici të ndershëm ishte në rrezik! Kjo është një këmbanë alarmi për të gjithë ne! Është detyra jonë të reagojmë!” – thuhet në njoftimin e protestës.

Marshimi do të nisë nga Sheshi Skënderbej dhe do të vazhdojë drejt Ministrisë së Brendshme, ku protestuesit pritet të kërkojnë transparencë dhe veprime konkrete nga autoritetet për zbardhjen e plotë të ngjarjes.

Lëvizja ‘Shqipëria Bëhet’ i bën thirrje qytetarëve të bashkohen në këtë protestë për jetën, sigurinë dhe drejtësinë.