Policia e Lezhës ka finalizuar me sukses operacionin e koduar “Shades”, duke vënë në pranga dy persona të dyshuar për disa vjedhje me thyerje. Në pranga kanë përfunduar shtetasit Sokol Pali, 52 vjeç, dhe Marjan Kelaj, 51 vjeç, të dy banues në Shkodër.

Dy të arrestuarit akuzohen se ditën e djeshme kanë vjedhur shuma parash, pajisje pune dhe produkte të ndryshme në dy dyqane në fshatin Blinisht dhe një servis në fshatin Dajç.

Gjithashtu, nga hetimet e mëtejshme, policia ka zbardhur 6 raste të vjedhjeve në banesa, të kryera më parë nga këta shtetas. Gjatë kontrolleve në banesat e tyre, janë sekuestruar sende të dyshuara të përdorura për kryerjen e vjedhjeve dhe objekte të dyshuara si të vjedhura.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm, Lezhë, ndërsa të arrestuarit do të përballen me akuzën për “Vjedhje”, kryer në bashkëpunim dhe në mënyrë të përsëritur.