Në një intervistë të dhënë për gazetarin Blendi Fevziu, Linda Rama, bashkëshortja e kryeministrit Edi Rama, u shpreh qartë se nuk ka ndërmend të përfshihet në politikë apo të angazhohet në ndonjë parti politike.

Ajo theksoi se mbështetja e saj për politikën ka ardhur përmes rolit të saj si partnere e kryeministrit dhe duke mbështetur përpjekjet për përmirësimin e mirëqenies së qytetarëve dhe zhvillimin e vendit.

“Unë i kam dhënë politikës nëpërmjet mbështetjes, se politikën e shoh si një instrument për mirëqenien e njerëzve dhe vendit. E kam dhënë duke mbështetur, duke qenë në krah të Edit… Mendoj i kam dhënë gjithçka. Nuk do të angazhohem ndonjëherë në një parti politike. Unë e kam zgjedhur rrugën time dhe nuk e kam ndryshuar. Kam insistuar në atë që dua të bëj dhe e kam të qartë se në çfarë dua të jem e dobishme,” deklaroi Linda Rama.

Kjo deklaratë vjen pas spekulimeve të herëpashershme mbi një angazhim të mundshëm të saj në politikën aktive, të cilat ajo i hodhi poshtë prerazi, duke konfirmuar përkushtimin e saj ndaj angazhimeve të tjera profesionale dhe personale jashtë arenës politike.