Ish-kryetari i Bashkisë së Kukësit, Safet Gjici, është liruar nga qelia dhe do të vijojë vuajtjen e dënimit në kushtet e arrestit shtëpiak. Vendimi u mor nga Gjykata e Apelit të Juridiksionit të Përgjithshëm, e cila pranoi kërkesën për zbutje të masës së sigurisë.

Sipas burimeve zyrtare, masa e re u vendos për shkak të gjendjes së tij shëndetësore.

Gjicit i kishin mbetur edhe rreth 8 muaj dënim, të cilat tashmë do t’i kryejë në banesën e tij.

Ish-kryebashkiaku u dënua pas publikimit të një videoje skandaloze që shkaktoi tronditje në opinionin publik dhe politikën shqiptare. Megjithatë, me vendimin më të fundit të Apelit, dënimi i tij nuk do të vijojë më në institucionin e vuajtjes së dënimit, por në shtëpi, nën mbikëqyrje të autoriteteve.

Ky zhvillim pritet të ngjallë debate, sidomos në opinionin publik, për mënyrën se si po trajtohen rastet që kanë pasur jehonë të gjerë dhe ndjeshmëri të lartë sociale.