Paneli Zgjedhor për Ankesa dhe Parashtresa (PZAP) ka certifikuar të shtunën kandidatët e Listës Serbe për deputetë në zgjedhjet e parakohshme parlamentare të 28 dhjetorit, pas përpjekjeve të disa anëtarëve të Komisionit Qendror të Zgjedhjeve për të bllokuar pjesëmarrjen e tyre.

Sipas njoftimit të PZAP-it, ankesë e partisë më të madhe të serbëve në Kosovë kundër vendimit të KQZ-së për moscertifikimin e 33 kandidatëve u pranuar, dhe të gjithë kandidatët u certifikuan.

Në mbledhjen e komisionit më 10 dhjetor, anëtarët e Lëvizjes Vetëvendosje në KQZ, Sami Kurteshi dhe Alban Krasniqi, votuan kundër certifikimit, me Kurteshin që deklaroi shkurt se “jam kundër certifikimit të Listës Serbe bashkë me kandidatët e saj”, pa dhënë arsyet e plota.

Lista Serbe, e cila ka mbështetje nga Beogradi, mirëpriti vendimin e PZAP-it dhe e akuzoi kryeministrin në detyrë, Albin Kurti, për përpjekje dhe trysni për të penguar pjesëmarrjen e saj në zgjedhje.