Vendlindja biblike e Jezusit, Betlehemi, po përballet me një realitet tjetër këtë vit, duke u shndërruar në një qytet fantazmë për shkak të luftës midis Izraelit dhe Hamasit. Në kohën kur kleri katolik lutet për paqen në Vatikan dhe Betlehem, operacionet e forta ushtarake nga Izraeli kundër Hamasit vazhdojnë me intensitet, duke sjellë shkëmbime zjarri edhe në kufirin mes Izraelit dhe Libanit.

Numri i viktimave po rritet, me mbi dhjetë ushtarë izraelitë që raportohen të vrarë gjatë kësaj fundjave në Gazë. Luftimet janë bërë më të ashpra që prej sulmit të Hamasit më 7 tetor. Izraeli thotë se ka humbur 154 persona nga fillimi i kundërpërgjigjes ushtarake ndaj Hamasit në Rripin e Gazës.

Sipas të dhënave të Hamasit, mbi 20 mijë palestinezë kanë rezultuar të vrarë në sulmet ajrore dhe operacionet tokësore të Izraelit. Përveç kësaj, Hezbollahu, i mbështetur nga Irani, ka vazhduar sulmet ndaj objektivave izraelite, rritur rrezikun e përfshirjes së plotë në luftë të Hezbollahut dhe grupeve të tjera të lidhura me Iranin në Lindjen e Mesme.

Edhe pse Presidenti Joe Biden dhe Kryeministri izraelit Benjamin Netanyahu mohuan trysninë e SHBA-së për një armëpushim në Gazë, duke mos lejuar ndërprerjen e operacioneve ndaj Hamasit, tensionet dhe luftimet vazhdojnë të krijojnë një atmosferë të mbingarkuar dhe të papërshtatshme për festat e Krishtlindjeve.

Izraeli thotë se ka humbur tetë ushtarë dhe katër civilë nga shkëmbimet e zjarrit me Hezbollahun.

Presidenti Joe Biden dhe kryeministri i Izraelit Bejnamin Netanyahu e kanë mohuar artikullin e gazetës amerikane”Wall Street Journal” se presidenti amerikan i ka bërë trysni Izraelit që ta pranojë armëpushimin në Gazë dhe të mos sulmojë Hezbollahun, pasi ekziston rreziku që grupi militant libanez të kryejë një sulm të ngjashëm me atë të Hamasit më 7 tetor ndaj Izraelit.

“Zhvillova një bisedë të gjatë me Netanyahun. Ishte një bisedë private, por nuk i kërkova armëpushim”, tha Presidenti Biden për gazetarët ndërsa largohej nga Shtëpia e Bardhë për në vendpushimin presidencial Camp David.

Kryeministri Netanyahu, gjatë takimit javor të kabinetit të dielën, gjithashtu e mohoi se Presidenti Biden i bëri trysni për operacionet ushtarake .

“Kam folur të shtunën në mbrëmje me Presidentin Biden. Unë kam parë publikime të rreme që pretendojnë se SHBA-të po na pengojnë në operacionet në terren; kjo nuk është e vërtetë. Izraeli është një shtet sovran. Vendimet tona mbështeten tek vlerësimet tona operacionale. Operacioni ynë nuk diktohet nga trysnitë e jashtme”, tha zoti Netanyahu.

Shtëpia e Bardhë e ka akuzuar Teheranin se është ‘thellësisht i përfshirë’ në planifikimin e operacioneve të grupit militant jemenas, Houthi për t’u përfshirë në luftën Izrael – Hamas dhe po i mbështet grupet që sulmojnë bazat amerikane në Lindjen e Mesme. Por ministri i jashtëm iranian, Hossein Amirabdollahian, i mohoi akuzat e Uashingtonit.

“Në një moment, amerikanët na kërkuan që ta këshillojmë Jemenin që të mos veprojë kundër amerikanëve dhe madje edhe kundër regjimit izraelit. Ne u thamë se Jemeni ka vendosur vet se si duan të ndërhyjnë në çështjen e Gazës. Ne nuk i kemi urdhëruar kurrë që të bëjnë gjë, por gjithashtu nuk do t’i urdhërojmë kurrë që të ndalojnë sulmet e tyre”, tha kryediplomati iranian.

Luftimet në Lindjen e Mesme dhe numri në rritje i viktimave kanë bërë që Krishtlindjet këtë vit të priten pa atmosferë festive në Betlehem, vendin e lindjes së Jezusit.

Të krishterët përbëjnë rreth 2% të popullsisë në të gjithë Izraelin dhe territoret e pushtuara palestineze, sipas një fushate të organizuar nga krerët e kishave në Jerusalem.

“Është një Krishtlindje shumë e trishtueshme pa atmosferë feste sepse jemi në luftë. Ne jemi këtu për t’u lutur, jo vetëm për armëpushim. Ne duhet t’i ndalojmë këto armiqësi. Mesazhi i Krishtlindjes nuk është dhuna, është paqja”, thotë patriarku i Jerusalemit, Pierbattista Pizzaballa.

Të dielën në Vatikan Papa Fraçesku u lut për njerëzit që vuajnë nga lufta.

“Ne jemi pranë vëllezërve dhe motrave tona që vuajnë nga lufta. Ne mendojmë për Palestinën, Izraelin, Ukrainën. Mendojmë edhe për ata që vuajnë nga mjerimi, uria, skllavëria”, tha Papa Françesku.

Më vonë në mbrëmje, Papa do të mbajë meshën e Krishtlindjes në Bazilikën e Shën Pjetrit