Lulzim Basha ka vendosur që të heqë dorë nga drejtimi i Partisë Demokratike, por jo nga takimet që bëhen në emër të Europës.

Ai është fotografuar mbrëmjen e djeshme në shoqërinë e ambasadores amerikane Yuri Kim, dhe kreut të grupit parlamentar të PD-së Enkelejd Alibeaj, i cili për njëfarë kohe u shpall dhe kryetar i komanduar i PD-së.

Shkak për takimin mes politikanëve shqiptarë dhe diplomates amerikane është bërë ceremonia e mbajtur nga delegacioni i BE-së në Tiranë në lidhje me festimet e “Ditës së Evropës”.

Siç shihet dhe nga fotoja, Basha dhe Alibeaj kanë patur një takim të ngrohtë dhe miqësor me ambasadoren Yuri Kim, teksa të tre shfaqen duke buzëqeshur.

Të pranishëm në këtë takim kanë qenë edhe deputetë nga Komisioni i Rithemelimit, por jo vetë Berisha, i cili është shpallur non grata nga SHBA-të.

Alibeaj, i cili nuk gëzon mbështetjen e shumicës së deputetëve në grupin parlamentar të PD-së, ka përfaqësuar zyrtarisht këtë forcë politike në procesin e zgjedhjes së presidentit.

Gjatë ditës së sotme pritet që Alibeaj të ulet në një tavolinë me përfaqësues të mazhorancës, për të dakordësuar axhendën e zgjedhjes së presidentit, në konferencën e kryetarëve.