Lushnje, 29 maj 2025 – Një zjarr i fuqishëm ka përfshirë orët e para të mëngjesit ish-parkun e mjeteve në qytetin e Lushnjes, duke shkaktuar dëme të mëdha materiale.

Zjarri ka shpërthyer rreth orës 03:45, duke përfshirë katër autobusë, ku tre janë djegur plotësisht, ndërsa një tjetër është dëmtuar pjesërisht.

Falë ndërhyrjes së shpejtë të forcave zjarrfikëse nga Lushnja, Divjaka dhe Fieri, është arritur të shmanget përhapja e flakëve në zona të tjera të parkut, duke parandaluar një katastrofë më të madhe.

Policia dhe grupi hetimor ndodhen në vendngjarje dhe kanë nisur hetimet për të zbardhur shkaqet e zjarrit, i cili ka lënë pas dëme të konsiderueshme ekonomike.

Autoritetet nuk kanë dhënë ende një version zyrtar mbi natyrën e zjarrit, por nuk përjashtohet as pista e një zjarri të qëllimshëm.