Një video e publikuar nga grupi militant Hamas ka shkaktuar reagime të ashpra në skenën ndërkombëtare. Pamjet e publikuara tregojnë një nga pengjet izraelite të mbajtur në Gaza, i cili ndodhet brenda një tuneli, duke hapur varrin e tij dhe duke deklaruar se nuk kishte ngrënë prej ditësh.

Presidenti i Francës, Emmanuel Macron, reagoi me tone të forta ndaj këtij materiali filmik, duke e cilësuar si akt çnjerëzor.

“Një mizori e turpshme, një çnjerëzim i pakufizuar. Kjo është ajo që përfaqëson Hamas. Imazhet që tregojnë pengjet izraelite të mbajtura në Gaza janë një tmerr. Lirimi i tyre duhet të jetë i menjëhershëm,” deklaroi Macron.

Ky reagim vjen në një kohë kur përpjekjet diplomatike për lirimin e pengjeve dhe ndërprerjen e luftimeve mes Izraelit dhe Hamasit vazhdojnë, por pa arritur ende në një zgjidhje konkrete.