Në kuadër të operacionit antidrogë të koduar “Voskopi”, numri i të arrestuarve në Korçë ka arritur në katër. Të arrestuarit janë Gentian Guri, Andon Demirshan, Anesti Burda dhe Redion Hamitaj.

Ndërkohë, janë vënë nën hetim edhe tre shtetase për moskallëzim të krimit, ndërsa një tjetër është shpallur në kërkim për dyshimin e përfshirjes në këtë veprimtari kriminale.

Gjatë kontrollit të kryer në banesën e njërit prej të arrestuarve, policia gjeti dy bimë narkotike të kultivuara, si dhe sasi të vogla të lëndëve narkotike, përkatësisht kokainë dhe kanabis.

Në kuadër të këtij operacioni, policia sekuestroi gjithashtu 195 kilogramë kanabis në proces tharjeje, të cilat u gjetën në ambientet e magazinës. Në magazinë u zbuluan edhe pajisje që shërbenin për tharjen dhe përgatitjen e lëndës narkotike për shitje.

Në përfundim, janë sekuestruar një armë zjarri pistoletë, sasi kokaine, një leje drejtimi false, shtatë celularë, një automjet, një pasaportë, tre karta SIM dhe një shumë parash në euro.