Ministria e Brendshme e Maqedonisë së Veriut ka njoftuar se ka arrestuar tetë persona lidhur me incidentin e djegies së flamurit shtetëror, që ka shkaktuar reagime të forta brenda dhe jashtë vendit. Ngjarja ka ndodhur në lagjen Bit Pazar të Shkupit, gjatë kremtimit të 112-vjetorit të Pavarësisë së Shqipërisë, i cili është një ngjarje e shënuar edhe si Festë e Flamurit Kombëtar për shqiptarët.

Mes të arrestuarve është një i mitur, ndërsa të tjerët janë nga 18 deri 21 vjeç. Katër prej tyre janë akuzuar për “nxitje të urrejtjes ndëretnike, racore dhe fetare, dhe grindje e mosdurim”, vepra e cila mund të çojë në dënim deri në një vit burg. Incidenti është bërë viral në rrjetet sociale, duke nxitur reagime të ashpra nga partitë politike.

VMRO-DPMNE, partia në pushtet, ka kërkuar që autorët të përballen me drejtësinë dhe ka theksuar se ngjarja ka një prapavijë politike, duke pasur për qëllim nxitjen e tensioneve etnike. Lidhja Social Demokrate, e opozitës, ka akuzuar Ministrin e Brendshëm Pançe Toshkovski për dështimin në parandalimin e incidentit dhe kërkoi dorëheqjen e tij. Koalicioni VLEN, pjesë e qeverisë, gjithashtu ka dënuar incidentin dhe ka akuzuar Bashkimin Demokratik për Integrim (BDI) se po përpiqet të destabilizojë vendin.

Partitë shqiptare të opozitës, përfshirë BDI dhe Aleancën për Shqiptarët, kanë shprehur shqetësim për trajtimin selektiv të incidentit nga ana e policisë, duke theksuar se veprimet e policisë në sheshin Skënderbe kanë kontribuar në tensionet, përfshirë ndalimin e pjesëmarrësve shqiptarë në festën e flamurit.