Marc Marquez ka treguar edhe një herë se është padiskutim mbreti i Sachsenring, duke fituar Çmimin e Madh të Gjermanisë dhe duke regjistruar dopietën e tij të shtatë sezonale në Sprint-GP, një performancë që e afron edhe më shumë me titullin e madh të Kampionatit Botëror MotoGP 2025.

Piloti spanjoll i Ducati-t dominoi garën nga fillimi në fund, pa bërë asnjë gabim dhe pa lejuar asnjë rival t’i afrohej. Në pistën që konsiderohet “shtëpia” e tij, MM93 ishte thjesht i pandalshëm.

Pas tij, podiumi u plotësua nga vëllai i tij, Alex Marquez me ekipin Ducati Gresini, dhe kampioni në fuqi Francesco Bagnaia, i cili përfitoi nga rrëzimet dramatike të Fabio Di Giannantonio dhe Marco Bezzecchi, që humbën kontrollin në të njëjtën kthesë brenda pak xhirosh.

Shifra që bëjnë histori

Me këtë fitore, Marquez arrin në 69 fitore në klasën më të lartë, duke kaluar legjendën Giacomo Agostini dhe duke u pozicionuar në vendin e dytë të përjetshëm pas Valentino Rossit (89 fitore). Po ashtu, kjo ishte fitorja e tij e 12-të në Sachsenring, duke thelluar rekordin si piloti më i suksesshëm në këtë pistë.

Ai tashmë kryeson kampionatin me 83 pikë avantazh ndaj Alex Marquez, duke hapur seriozisht rrugën që të shpallet kampion që në raundet aziatike të vjeshtës, nëse vazhdon me këtë ritëm.

Gara, më shumë dramatike se spektakolare

E diela nuk ofroi shumë emocion në luftën për kreun, por u karakterizua nga përplasje të shumta – vetëm 10 nga 18 pilotë arritën vijën e finishit. Veçanërisht të dhimbshme ishin rrëzimet e Di Giannantonio-s dhe Bezzecchi-t, që ndodhën të dy në kthesën 1, duke i dhënë një kthesë të papritur podiumit.

Një sezon për librat e historisë?

Me një formë të jashtëzakonshme, përkushtim maksimal dhe dominim total në pista, Marc Marquez po ndërton një nga sezonet më mbresëlënëse të karrierës së tij. Nëse vazhdon me këtë intensitet, kurorëzimi i titullit të tetë në MotoGP është vetëm çështje kohe.

Sachsenring-i sërish foli “spanjollçe” dhe emri i tij ishte sërish Marc Marquez.