Gjyqtarja Marinela Osmani do të jetë ajo që do të shqyrtojë kërkesën e SPAK për kalimin në gjykim të dosjes penale ndaj kryetarit të Bashkisë Shkodër, Benet Beci, si dhe ndaj bashkëpandehurve të tjerë, përfshirë Adela Rukon, bashkëshorten e Ervis Berberit.

Vendimi për caktimin e gjyqtares është marrë përmes shortit elektronik, ndërsa në ditët në vijim pritet të përcaktohet data dhe ora e seancës paraprake gjyqësore.

SPAK ka marrë të pandehur Benet Becin për veprën penale “Shkelje e barazisë së pjesëmarrësve në tendera apo ankande publike”, në lidhje me një procedurë prokurimi me vlerë rreth 700 mijë euro. Sipas Prokurorisë së Posaçme, hetimet kanë ngritur dyshime për favorizim dhe shkelje të rregullave ligjore gjatë zhvillimit të kësaj procedure.

Procesi pritet të ndiqet me vëmendje të lartë, pasi lidhet me një funksionar të lartë vendor dhe me çështje që prekin transparencën dhe ligjshmërinë e përdorimit të fondeve publike.