Presidenti amerikan Donald Trump po shqyrton një sërë opsionesh të mundshme ushtarake ndaj Iranit, pas protestave vdekjeprurëse që kanë përfshirë vendin, raportoi CNN duke cituar dy zyrtarë amerikanë. Sipas tyre, Trump po vlerëson zbatimin e kërcënimeve të fundit për të goditur regjimin iranian në rast se përdoret forcë vdekjeprurëse kundër civilëve.

Zyrtarët i thanë CNN-së se presidenti është informuar ditët e fundit mbi plane të ndryshme për ndërhyrje, ndërsa dhuna në Iran ka çuar në dhjetëra të vrarë dhe arrestime masive. Disa nga diskutimet kanë përfshirë edhe opsione që nuk nënkuptojnë përdorim të drejtpërdrejtë të forcës ushtarake amerikane.

Një pjesë e opsioneve të paraqitura presidentit fokusohen në shënjestrimin e shërbimeve të sigurisë së Teheranit, të cilat po përdoren për shtypjen e protestave. Megjithatë, brenda administratës amerikane ka shqetësime se një ndërhyrje ushtarake mund të ketë efekt të kundërt, duke bashkuar popullin iranian rreth qeverisë ose duke nxitur hakmarrje ushtarake nga Irani.

Presidenti ende nuk ka marrë një vendim përfundimtar, por po i shqyrton seriozisht opsionet, ndërsa numri i viktimave vazhdon të rritet. Një zyrtar i lartë i Shtëpisë së Bardhë theksoi për CNN se planet nuk përfshijnë dërgimin e trupave amerikane në terren në Iran.

Sipas Agjencisë së Lajmeve të Aktivistëve të të Drejtave të Njeriut (HRANA), me seli në SHBA, të paktën 116 persona janë vrarë që nga shpërthimi i protestave në të 31 provincat e Iranit dy javë më parë. Megjithatë, vlerësohet se shifrat reale mund të jenë më të larta, për shkak të ndërprerjes së internetit dhe komunikimeve nga autoritetet iraniane.

“Irani po e sheh lirinë, ndoshta si kurrë më parë. SHBA-të janë gati të ndihmojnë!!!”, shkroi Trump në rrjetet sociale. Më herët, ai deklaroi se nëse Teherani do të përdorë dhunë vdekjeprurëse ndaj protestuesve, SHBA-të do të ndërhyjnë, duke shtuar se “do t’i godasim shumë fort aty ku dhemb”.

Ndërkohë, Sekretari amerikan i Shtetit, Marco Rubio, dhe kryeministri izraelit Benjamin Netanyahu kanë diskutuar situatën në Iran, si dhe zhvillimet në Siri dhe Gaza. Forcat Mbrojtëse të Izraelit njoftuan se po monitorojnë nga afër zhvillimet, ndërsa Netanyahu pritet të thërrasë një konsultim të posaçëm sigurie, me Iranin dhe Libanin në krye të axhendës.