Të enjten, CEO i Facebook Mark Zuckerberg tha se llogaritë e Presidentit Trump në Facebook dhe Instagram do të bllokohen “për një kohë të pacaktuar”, të paktën për dy javët e ardhshme para Ditës së Përurimit të Presidentit të zgjedhur.

“Ne besojmë se rreziqet e lejimit të Presidentit të vazhdojë të përdorë shërbimin tonë gjatë kësaj periudhe janë shumë të mëdha,” tha Zuckerberg në një deklaratë të enjten.

“Prandaj, ne jemi duke zgjatur bllokimin që kemi vendosur në llogaritë e tij në Facebook dhe Instagram për një kohë të pacaktuar dhe për të paktën dy javët e ardhshme derisa të përfundojë tranzicioni paqësor i pushtetit.”

Deklarata e Zuckerberg erdhi pasi Facebook fillimisht i kishte thënë për Fox News se Trump do të rifitonte aksesin në Facebook të enjten mbrëma, pasi u pezullua përkohësisht për shkak të shkeljeve të politikës së rrjetit social.

Llogaria e presidentit u pezullua pasi postoi një video që u thoshte protestuesve që sulmuan ndërtesën e Kapitolit, të “shkonin në shtëpi”, por duke pohuar se zgjedhjet presidenciale të vitit 2020 ishin “vjedhur”.

Zuckerberg, shtoi se “24 orët e fundit tregojnë qartë se Presidenti Donald Trump synon të përdorë kohën e tij të mbetur në detyrë për të minuar tranzicionin paqësor dhe të ligjshëm të pushtetit te pasardhësi i tij i zgjedhur, Joe Biden”.

“Vendimi i tij për të përdorur platformën e Facebook për të folur më tepër sesa për të dënuar veprimet e mbështetësve të tij në ndërtesën e Kapitolit, ka shqetësuar me të drejtë njerëzit në SHBA dhe në të gjithë botën,” shkroi Zuckerberg.

“Ne i hoqëm këto deklarata dje sepse gjykuam se efekti i tyre – dhe me gjasë qëllimi i tyre – do të ishte të provokonin dhunë të mëtejshme.”

Zuckerberg shtoi se “përparësia për të gjithë vendin duhet të jetë tani të sigurojë që 13 ditët e mbetura dhe ditët pas përurimit të kalojnë në mënyrë paqësore dhe në përputhje me normat e vendosura demokratike”