Mark Zuckerberg, Shefi Ekzekutiv i kompanisë Meta, që përfshin platformën Facebook, i deklaroi një komisioni të Kongresit amerikan se administrata e Presidentit Joe Biden kishte ushtruar presion mbi kompaninë për të censuruar disa informacione gjatë pandemisë COVID-19. Ai tha se presioni u ushtrua për të kufizuar përmbajtje që lidhej me pandeminë, përfshirë copëza humori dhe satire. Këto deklarata u publikuan në një letër nga Komisioni Juridik i Dhomës së Përfaqësuesve të hënën, ku Zuckerberg theksoi se “zyrtarët e administratës shprehën pakënaqësi të madhe me ekipet tona kur nuk ramë dakord me ta.”

Zuckerberg pohoi se sot kompania nuk do të merrte të njëjtat vendime si atëherë dhe shprehu pendim që Meta nuk ishte më transparente në ato momente. “Unë besoj se trysnia e qeverisë ishte e gabuar dhe jam penduar që nuk ishim më të hapur,” deklaroi ai.

Në përgjigje të komenteve të Zuckerberg, një zëdhënës i Shtëpisë së Bardhë u shpreh se administrata kishte vepruar për të mbrojtur shëndetin dhe sigurinë publike në kushtet e një pandemie vdekjeprurëse, duke inkurajuar veprime të përgjegjshme. “Qëndrimi ynë ka qenë i qartë dhe konsistent: ne besojmë se kompanitë e teknologjisë dhe aktorët e tjerë privatë duhet të marrin parasysh efektet që kanë veprimet e tyre tek publiku amerikan, kur marrin vendime të pavarura në lidhje me informacionin që publikojnë,” theksoi zëdhënësi.

Zuckerberg gjithashtu foli për një nismë prej 400 milionë dollarësh të financuar nga fondacioni i tij bamirës përpara zgjedhjeve presidenciale të vitit 2020. Ai shpjegoi se kjo nismë kishte për qëllim të siguronte që komunitetet urbane, periferike dhe rurale të kishin burimet e nevojshme për të votuar në mënyrë të sigurt gjatë pandemisë globale. Pavarësisht kritikave që nisma favorizoi një parti mbi tjetrën, Zuckerberg insistoi se synimi i tij ishte të qëndronte neutral dhe të shmangte çdo perceptim të ndikimit politik. “Nuk kam në plan të jap një kontribut të ngjashëm në këtë cikël zgjedhor,” përfundoi ai.