Ministrja për Europën dhe Punët e Jashtme, Olta Xhaçka ka pritur sot në një takim homologun spanjoll Jose Manuel Albares Bueno. Kjo vizitë i paraprin marrjes së Presidencës së BE nga Spanja në gjysmën e dytë të vitit.

Gjatë konferencës Xhaçka u shpreh se kjo vizitë është provë e vëmendjes së posaçme që Spanja po i kushton vendit tonë dhe rajonit.

Xhaçka: Ministri Albares na prezantoi linjat kryesore të Presidencës spanjolle. Ndajmë të njëjtin mendim, që zgjerimi nuk është thjesht një instrument i BE, por është vetë esenca e Unionit.

E informova homologun Albares mbi ecurinë e progresit të Shqipërisë në procesin e integrimit. Deri në fund të 2023, Shqipëria parashikon të përfundojë procesin e screening për të gjithë grup-kapitujt e negocimit.

Kërkova mbështetjen e Spanjës në lehtësimin e diskutimeve në Këshill, për një vendim pozitiv për hapjen e grupit të kapitujve themelorë. Ramë dakord për nënshkrimin e një Memorandum Bashkëpunimi mes vendeve tona. Synimi, arritja e një koordinimi sa më të mirë të punës për çështjet e integrimit evropian.

Në këtë memorandum parashikohet që Spanja, të na mbështesë duke ofruar shërbime konsulence dhe asistencë teknike. Në fokus të diskutimeve ishte edhe dimensioni mesdhetar i politikave tona të jashtme. Shqipëria mirëpret prioritetet e politikës së jashtme të Spanjës në këtë rajon, në kuadër të Presidencës të Këshillit.

Mirëpresim faktin që në vitet e fundit politika e jashtme spanjolle është orientuar edhe drejt Mesdheut Lindor, përfshirë Ballkanin Perëndimor.

Forcimi i bashkëpunimit BE-BP është bërë më i rëndësishëm se kurrë si pasojë e agresionit të paligjshëm rus ndaj Ukrainës. Shqipëria dhe Spanja, në krye të përpjekjeve për të mbështetur Ukrainën dhe vënien e Rusisë para përgjegjësisë.

Qasja strategjike e Spanjës ndaj rajonit tonë është veçanërisht e mirëpritur. Mirënjohës për angazhimin e BE dhe partnerëve amerikanë për arritjen e marrëveshjes për normalizimin e marrëdhënieve Kosovë-Serbi.

Ne shpresojmë që marrëveshja do të zbatohet në një kohë sa më të shkurtër. Kjo do të kishte një ndikim shumë pozitiv për stabilitetin dhe bashkëpunimin rajonal

Është në të mirën e rajonit dhe të vetë BE, që me Kosovën të ketë një angazhim sa më të gjerë e konstruktiv. Në fokus të bisedës, edhe vlerësimi i bashkëpunimit shumë të mirë dypalësh Shqipëri-Spanjë.

Ekziston një potencial i madh në marrëdhëniet mes dy vendeve tona, veçanërisht në fushën ekonomike, arsimore dhe turizmit. Konstatohet një rritje e turistëve që vijnë nga Spanja, si dhe një rritje e interesit të bizneseve spanjolle për të investuar në Shqipëri.

Konfirmova vullnetin e plotë të qeverisë shqiptare për nxitjen e mëtejshme të një bashkëpunimi sa më të ngushtë me Spanjën.