Policia e Tiranës në bashkëpunim me policinë e Shkodrës kanë arrestuar 66-vjeçarin  Prend Kola, ndaj të cilit Gjykata e Apelit të Tiranës ka dhënë një dënim me 12 vite burg për akuzën e mashtrimit me pasoja të rënda.

Prend Kola ka bashkëpunuar me shtetasen Albana Laze (e arrestuar më parë) dhe ka përfituar 100 mijë euro nga familjarët e një të dënuari duke i premtuar atij lirimin nga burgu të të afërmit të tyre.

Sipas gjykatës, Prend Kola i ka garantuar se në këmbim të 100 mijë eurove ai mund t’ia nxirrte nga burgu familjarin e tij brenda 6 muajsh, pasi kishte një njeriun e tij te Gjykata për Krimet e Rënda. Gjithashtu edhe Albana Laze,pasi eshte njohur me familjarët e të arrestuarit, është zotuar se kishte njohje te Krimet e Rënda.

Në vijim Kola dhe Laze i kanë marrë shumën 100 mijë euro. Para familjarëve ata kanë shtyrë disa herë kohën kur do ta lironin të arrestuarin, derisa Laze u arrestua për një episod tjetër mashtrimi, ndërsa Kola humbi kontaktet me ta.