Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka përfunduar hetimet dhe ka dërguar në gjyq shtatë persona, të akuzuar për mashtrim ndaj shtetasve të huaj, kryesisht italianë, përmes premtimeve të rreme për investime fitimprurëse në bursën “Forex”.

Të pandehurit B.B., K.D., J.J., A.Ll., E.A., Gj.R. dhe L.Sh. akuzohen për veprën penale “Mashtrimi”, të parashikuar nga neni 143/2 i Kodit Penal. Sipas hetimeve, ata vepronin në bashkëpunim me njëri-tjetrin, duke zhvilluar një skemë të mirëorganizuar mashtruese në ambientet e shoqërisë “OZAR” sh.p.k., e strukturuar në formën e një call center-i.

Nga aktet hetimore rezulton se grupi synonte shtetas të huaj, mes tyre edhe italianët L.C. dhe S.S., të cilëve u premtoheshin fitime nga investime të supozuara në tregjet financiare. Në realitet, aktiviteti kishte si qëllim përfitimin financiar përmes mashtrimit, ndërsa secili prej të pandehurve kishte rol në funksionimin dhe vijimësinë e kësaj skeme.

Procedimi penal nr. 8500 i vitit 2023 është nisur pas informacioneve operative të siguruara nga Drejtoria e Përgjithshme e Policisë, lidhur me subjekte të licencuara dhe të palicencuara që ushtronin veprimtari në fushën e “Forex”.

Ndërkohë, Prokuroria bën me dije se nga ky procedim janë veçuar disa akte dhe po vijojnë hetimet në një çështje të re, me nr. 8500/1, për veprën penale “Mashtrimi me pasoja të rënda”, si dhe për “Pastrimin e produkteve të veprës penale”, në bashkëpunim me autoritetet e huaja, lidhur me viktima të tjera të dyshuara.