Policia e Korçës ka vënë në pranga një 28-vjeçar të shpallur në kërkim, i dyshuar për mashtrime të shumta dhe vjedhje. I arrestuari është Johan Mysllinj, i cili, sipas hetimeve, ka mashtruar gjashtë qytetarë duke u marrë shuma të ndryshme parash me pretendimin se kishte probleme shëndetësore, si dhe ka kryer një vjedhje në një biznes lokal.

Sipas njoftimit të policisë, Mysllinj u kap në një banesë të braktisur në lagjen nr. 4 të qytetit, ku fshihej prej disa javësh.

“Ky shtetas ishte shpallur në kërkim pas kallëzimeve të disa qytetarëve, të cilët denoncuan se ai i kishte mashtruar me pretekste të ndryshme, duke përfituar shuma të konsiderueshme parash”, njoftoi policia.

Vjedhja në restorant

Hetimet zbuluan se më datë 8 nëntor 2025, në lagjen nr. 7, Korçë, 28-vjeçari kishte hyrë në ambientet e një restoranti dhe kishte vjedhur 70.000 lekë nga kasa, duke u larguar menjëherë pas ngjarjes.

Autoritetet kanë sekuestruar prova materiale që lidhen me rastet e mashtrimit dhe po vijojnë hetimet për të zbardhur nëse Mysllinj është i përfshirë edhe në ngjarje të tjera të ngjashme.

Materialet i janë referuar Prokurorisë së Korçës për veprime të mëtejshme ligjore, nën akuzat për “mashtrim” dhe “vjedhje”.