Mauro Icardi, sulmuesi argjentinas i Galatasaray, ka tërhequr sërish vëmendjen, por këtë herë jo për performancat e tij në fushë. Futbollisti 31-vjeçar është bërë protagonist i një incidenti të bujshëm gjatë një aktiviteti publik të organizuar nga klubi turk, duke goditur me shuplakë një tifoz të skuadrës së tij.

Ngjarja ndodhi para dhjetëra kamerave dhe fëmijëve të pranishëm, të cilët kishin ardhur për të marrë autografe. Sipas videove që po qarkullojnë me shpejtësi në rrjetet sociale, një tifoz iu afrua Icardit për një foto ose autograf, por reagimi i sulmuesit ishte i dhunshëm dhe i papritur. Ai e shtyu tifozin dhe më pas e goditi, ndërsa largohej i zemëruar së bashku me partneren e tij Wanda Nara.

Mediat turke raportojnë se veprimi i Icardit ka shkaktuar polemika të mëdha në vend, duke ngritur pikëpyetje mbi gjendjen e tij emocionale dhe marrëdhënien me tifozët. Shumë analistë sportivë e cilësojnë këtë si një shpërthim të papranueshëm, ndërsa të tjerë spekulojnë se pas incidentit mund të fshihen probleme personale.

Deri më tani, Galatasaray nuk ka dhënë asnjë deklaratë zyrtare, por presioni mbi klubin dhe lojtarin pritet të rritet, ndërsa videot e incidentit vazhdojnë të bëjnë xhiron e rrjetit.