Deputeti i PD, Dashnor Sula, gjatë një fjalimi të ashpër në Kuvend, kritikoi mënyrën se si u ekzekutua megaoperacioni i SPAK më 17 maj, ku u goditën 7 grupe kriminale dhe u lëshuan 50 urdhër-arreste. Sula akuzoi Policinë e Shtetit se kishte lajmëruar kriminelët e fuqishëm, duke lejuar arratisjen e tyre, ndërsa vetëm ish-deputeti i PS, Arben Ndoka, u arrestua.

“Do doja që të thosha zonja kryetare por sot nuk ta them dot sepse më vjen turp mënyra se si po drejton sot është për të ardhur turp,” tha Sula, duke iu drejtuar kryeparlamentares. Ai shtoi se opozita po kërkonte të drejtat e veta, ndërsa pushteti dhe pasuritë janë në duart e mazhorancës.

Sula kritikoi hapur edhe drejtuesit e Policisë së Shtetit, duke i akuzuar për bashkëpunim me kriminelët dhe për lajmërimin e tyre përpara operacionit. “Kishte 50 urdhra arresti, pse nuk u ekzekutuan? Pse u ekzekutua ai për kolegun tuaj, sepse lajmëruat ata tjerët ju, ata të fortët. Kjo është e vërteta,” përfundoi Sula.