Kryeministrja italiane, Giorgia Meloni, gjatë një takimi të rëndësishëm me presidentin ukrainas, Volodymyr Zelensky, në Romë, ka theksuar nevojën për një angazhim të qartë nga Rusia për të ndjekur paqen në Ukrainë. Takimi ndodhi pas funeralit të Papa Françeskut dhe përfaqësoi një moment kyç në përpjekjet për të shtyrë procesin e paqes.

Në një deklaratë zyrtare nga qeveria italiane, Meloni përsëriti mbështetjen e Italisë dhe aleatëve të saj perëndimorë për një paqe të drejtë dhe të qëndrueshme që garanton sovranitetin dhe sigurinë e Ukrainës. Ajo theksoi se ishte e domosdoshme që Rusia të tregonte gatishmëri konkrete për të ndjekur një proces paqeje, duke kërkuar një armëpushim të menjëhershëm dhe të pakushtëzuar.

Meloni gjithashtu shprehu ngushëllimet e qeverisë italiane për viktimat e sulmeve të fundit ruse në Ukrainë, duke dënuar ashpër këto akte të dhunshme. “Kryeministrja ka nënvizuar se është jetike që Rusia të angazhohet seriozisht për një marrëveshje paqeje dhe të respektojë vullnetin për të ndaluar armiqësitë,” tha në deklaratën e saj qeveria e Romës.

Për më tepër, kryeministrja italiane ka përshëndetur gatishmërinë e plotë të Ukrainës për të arritur një armëpushim të menjëhershëm, duke nënvizuar se ky është një hap i rëndësishëm në përpjekjet për stabilizimin e situatës dhe ruajtjen e paqes në rajon. “Tani presim që Rusia të demonstrojë në praktikë vullnetin e saj për të ndjekur paqen,” ka theksuar Meloni në deklaratën e qeverisë italiane.

Ky takimi ka shtuar edhe më shumë presion mbi Moskën për të marrë hapa të qartë drejt një zgjidhjeje diplomatike, ndërkohë që lufta në Ukrainë vazhdon të shkaktojë pasoja të rënda dhe të vazhdueshme për popullsinë civile dhe stabilitetin global. Italia, si një prej aleatëve kryesorë të Ukrainës, ka vazhduar të ofrojë mbështetje të fortë për Kievin në përpjekjet e tij për të mbrojtur sovranitetin dhe sigurinë e vendit.