Kryeministrja italiane Giorgia Meloni vizitoi sot qytetin Niscemi në Siçilinë lindore, ku mbi 2 mijë banorë janë detyruar të braktisin banesat për shkak të rrëshqitjeve të dheut që kanë përfshirë zonën.

Fenomeni, i cili u përkeqësua tre javë më parë pas uraganit Harry, ka krijuar një front rrëshqitjesh që tashmë tejkalon pesë kilometra, duke dëmtuar banesa dhe infrastrukturë.

Gjatë takimit me një komitet qytetarësh të evakuuar, Meloni njoftoi se qeveria në Romë do të akordojë menjëherë 150 milionë euro për menaxhimin e emergjencës. Fondet do të përdoren për shembjen e ndërtesave të pabanueshme, ndërtimin e shtëpive të reja dhe realizimin e ndërhyrjeve mbrojtëse për të frenuar avancimin e rrëshqitjeve.

Masat konkrete pritet të miratohen të mërkurën në formën e një dekreti legjislativ. Ndërkohë, kreu i Mbrojtjes Civile Italiane, Fabio Ciciliano, do të marrë edhe rolin e komisionerit të posaçëm qeveritar për zbatimin e ndërhyrjeve në zonë.

Paketa mbështetëse do të përfshijë gjithashtu ndihmë financiare për fermerët që nuk kanë akses në tokat e tyre, si dhe për qytetarët që nuk mund të punojnë për shkak të shpalljes së “zonës së kuqe”, e vendosur për arsye sigurie.