Ndërkohë që çështja Jashari vijon të mbetet e pazgjidhur mes Belgjikës dhe Italisë, Milani po punon intensivisht për përforcime të tjera në merkato. Trajneri Massimiliano Allegri ka përcaktuar prioritetet: një mbrojtës i djathtë dhe një sulmues për të kompletuar repartin ofensiv përkrah Santiago Gimenez.

Në mbrojtje, objektivi kryesor mbetet Guéla Doué i Strasburgut. Kuqezinjtë po negociojnë për të ulur kërkesat e klubit francez dhe marrëveshja pritet të mbyllet në ditët e ardhshme.

Ndërsa për repartin e sulmit, strategjia e klubit është të veprojë në gjysmën e dytë të gushtit. Goditja e madhe pritet të vijë para ndeshjes hapëse të kampionatit më 23 gusht kundër Cremoneses në “San Siro”.

Emri që po fiton gjithnjë e më shumë terren është Dusan Vlahovic. Juventus ka nevojë urgjente për të shitur dhe ulja e kërkesave financiare e bën pistën të arritshme për Milanin.

Në skenë është futur edhe Gonçalo Ramos. Sulmuesi portugez, i transferuar verën e kaluar nga Benfica te PSG për 65 milionë euro, është ofruar nga agjenti Jorge Mendes. Opsioni që po diskutohet është huazim me të drejtë blerjeje, me një pagë prej 3 milionë eurosh.

Ndërkohë, për daljet nga ekipi:
• Bennacer ka oferta nga Arabia Saudite, por ende nuk është bindur,
• Adli po pret një sistemim në Europë,
• Bologna pritet të shtyjë për Okafor pas shitjes së Ndoye,
• Për Chukwueze ka vetëm interesa për huazim.

Merkatoja e Milanit hyn kështu në fazën vendimtare të verës, me synimin për të kompletuar një skuadër konkurruese në prag të sezonit të ri.