Milani ka pësuar dy humbje në tre ndeshjet e para të këtij sezoni në Champions League, duke mos arritur të marrë asnjë pikë deri tani. Humbjet erdhën kundër Liverpoolit dhe Bayer Leverkusenit, duke i lënë kuqezinjtë në vendin e fundit në grup me zero pikë. Këtë të martë, Milani do të përballet në shtëpi me belgët e Club Brugge, në orën 18:45, një ndeshje që trajneri Paolo Fonseca e konsideron tejet të rëndësishme për skuadrën.

“Nuk është një ndeshje vendimtare, por është një ndeshje që duhet ta fitojmë. Ne duhet të jemi më pak shenjtorë, por të mbetemi ata që jemi: Djaj!” u shpreh Fonseca, duke përforcuar nevojën për agresivitet dhe përqendrim në këtë fazë të garës.

Trajneri ka zbuluar gjithashtu formacionin që pritet të zbresë në fushë, duke përfshirë Maignan në portë, Emerson, Gabbia, Tomori dhe Theo në mbrojtje, Fofana, Loftus dhe Reijnders në mesfushë, ndërsa Leao, Pulisic dhe Morata do të formojnë vijën sulmuese.

Fonseca theksoi rritjen e skuadrës pas dy humbjeve në Champions League: “Kjo është ajo që kërkojmë. Champions League është një kompeticion ndryshe dhe ne e nisëm kundër dy skuadrave më të forta në Evropë. Kundër Liverpoolit patëm vështirësi, por ndaj Leverkusenit zhvilluam një ndeshje cilësore.”

Ai përmendi se edhe pse nuk arritën të fitojnë ndaj Leverkusenit, Milani tregoi shenja përmirësimi. “Tani përballemi me Club Brugge dhe duhet të vazhdojmë të rritemi, si dhe të fitojmë për të mbajtur shpresat tona në këtë kompeticion,” përfundoi trajneri portugez.