Aktorja Mimoza Marjanaku ka ndarë detaje personale nga jeta në emigrim dhe nga njohja e afërt me këngëtaren Parashqevi Simaku, historia e së cilës tronditi opinionin publik shqiptar pas zbulimit se ajo jetonte si e pastrehë.

E ftuar në emisionin “S’e Luan Topi” në Top Channel, Marjanaku kujtoi vitet e studimit dhe qëndrimin në konvikt me Simakun, duke theksuar thjeshtësinë dhe natyrën e saj njerëzore, pavarësisht famës.

“E kam pasur në kurs Parashqevinë. Në vit të parë kam qenë në një dhomë me të, dhe megjithëse ishte artiste e njohur, ishte konviktore si ne. Ajo e harronte faktin që ishte artiste kur ishte me ne, sepse kishte hyrë për të bërë diçka të re. Ishte shumë e thjeshtë”, tregoi Marjanaku.

Aktorja u ndal edhe te videoja e publikuar së fundmi, ku Simaku u shfaq në kushte të vështira jetese, duke shprehur shqetësimin e saj për mënyrën se si u trajtua rasti.

“Kam pasur bindjen që Parashqevia nuk ka qenë gati për atë lloj ekspozimi. Ajo kishte ende probleme. Videoja u përdor dhe u përfol shumë, madje u tha se ishte gati për koncert. Nuk e besoj që është gati. Për mua, ajo u shfrytëzua”, u shpreh Marjanaku.

Rrëfimi i aktores ka rikthyer vëmendjen mbi historinë e dhimbshme të këngëtares së njohur dhe ka ngritur pikëpyetje mbi mënyrën se si trajtohen raste të ndjeshme në publik dhe media.