Ministrat e Jashtëm të NATO-s do të mblidhen në Bruksel këtë të mërkurë për të mbajtur 2 ditë bisedime, për mënyrën më të mirë për të mbështetur Ukrainën në fazën tjetër të konfliktit.

Sekretari i Përgjithshëm i NATO-s, Jens Stoltenberg tha se aleanca pret që Moska të përpiqet të pushtojë “të gjithë” rajonin e Donbasit në lindje, me synimin për të krijuar një korridor tokësor nga Rusia në Krimenë e aneksuar. Por ai vazhdon të këmbëngulë se asnjë trupë apo avion i NATO-s nuk do të dërgohet për të luftuar në Ukrainë.

SHBA dhe BE do të vendosin sanksione shtesë ndaj Rusisë, në mesin e akuzave për krime lufte në qytetin ukrainas të Bucha. Imazhet e varreve masive dhe trupave të civilëve të ekzekutuar në periferi të Kievit kanë tronditur botën.

Washingtoni thotë se do të ndalojë investimet e reja në Rusi dhe do të vendosë sanksione të mëtejshme ndaj institucioneve financiare ruse. Në shqyrtim janë edhe masa që synojnë dy vajzat e Putinit dhe bankën më të madhe të Rusisë.