Ministri i Brendshëm Taulant Balla ka shprehur mbështetjen e tij për idenë e ndalimit të përdorimit të rrjeteve sociale nga persona nën 16-vjeç. Kjo deklaratë vjen pas ngjarjes tragjike në Durrës, ku një nënë e katër fëmijëve humbi jetën pas bullizimeve në rrjete sociale.
Ministri tha se kjo çështje është pjesë e analizës së tyre, ndërsa vlerësoi veprimin e policisë dhe referimin në prokurori për rastin në fjalë. Ideja e ndalimit të përdorimit të rrjeteve sociale nga moshat nën 16-vjeç po shqyrtohet në shumë vende, përfshirë shtetin e Floridës në SHBA.
Ky është një diskutim që nuk do të kthehet më mbrapsht dhe nuk do të lihet më në sirtar. Bën pjesë në prioritetet e mia, sa i përket mbrojtjes së jetës private të qytetarëve. Sa i takon mbrojtjes kryesisht të fëmijëve dhe të rinjve nga fenomene si bullizmi, por bullizmi nuk po njeh moshë. Jam njohur sot me një iniciativë të ndërmarrë nga një prej shteteve të SHBA, në Florida, për të vënë kufizime në përdorimin e rrjeteve sociale, pra për të ndaluar përdorimin e rrjeteve sociale nga fëmijët nën 16 vjeç. Mendoj që është një ide e mirë. Qytetarët të referojnë çdo problem me rrjetet sociale në polici. Në Durrës ne kemi një seksion të posaçëm”, shtoi Balla.
“E vërteta është që ne i ndjekim dhe kemi pasur raste të suksesshme të bllokimit të faqeve nga vjen sulmi, por shkojmë përtej në bashkëpunim me prokurorinë. Këtu dua të nxis prokurorët të jenë më bashkëpunues”, tha më tej ministri.
Në një deklaratë për mediat pasi mori pjesë në analizën vjetore të Drejtorisë Vendore të Policisë së Durrësit ministri ka folur për rezultatet e arritura në 2023 dhe për sfidat në vijim.
“Drejtoria e Durrësit dhe ajo e kufirit janë të rëndësishme. Gjatë 2023 kemi pasur rezultate të mira kryesisht në parandalimin e ngjarjeve kriminale por mos harroni se kemi pasur edhe ngjarje kriminale njëra prej të cilave është në punë e sipër duke u hetuar nga policia dhe shpresoj që të shkojmë drejt rezultateve për të vënë para përgjegjësisë personat përgjegjës. Duhet të kuptojmë që Durrësi është kryeqendër edhe e turizmit dhe vëmendja jonë është shumë e madhe. Po planifikojmë që përgjatë sezonit të ri turistik të kemi edhe mbështetjen e forcës kombëtare të sigurisë për të garantuar një sezon turistik të suksesshëm”.
