Ministri i Brendshëm, Taulant Balla, ka bërë një njoftim të rëndësishëm për një projekt të quajtur ‘Smart City’, i cili është në proces bashkëpunimi me qeverinë e Emirateve të Bashkuara Arabe. Ky projekt synon monitorimin e zonave turistike dhe qyteteve në Shqipëri me qëllim rritjen e sigurisë publike.

Në deklaratën e tij, ministri Balla po ashtu bëri të ditur se përmes këtij projekti do të pajiset punonjësit e policisë me kamera trupi për të forcuar masat e sigurisë. Megjithatë, ai theksoi se ky projekt nuk do të jetë gati për këtë sezon turistik.

“Edhe pse nuk do të mund të kemi projektin gati për këtë sezon turistik, është e rëndësishme të përmendim se mezi presim të fillojmë zbatimin e projektit të madh ‘SMART CITY’ në të gjitha qytetet kryesore të Shqipërisë dhe zonat turistike. Ky projekt do të përfshijë monitorimin e sigurisë publike, mbrojtjen e jetës dhe pronës private, monitorimin e trafikut dhe bregdetit, si dhe pajisjen e punonjësve të policisë me kamera trupi përmes një sistemi të zgjidhjeve teknologjike dhe inteligjencës artificiale. Ky investim do të na mundësojë të arrijmë nivelin e sigurisë që synojmë”, deklaroi Balla.

Ai gjithashtu theksoi se Autoriteti Rrugor Shqiptar po investon në Qendrën e Monitorimit të Trafikut për të siguruar një kontroll digjital të sigurisë rrugore në 200 kilometrat e para të rrugëve kryesore.

“Nevojitet bashkëpunimi i të gjithëve për të garantuar një sezon veror turistik me kujtime të bukura për çdo vizitor dhe qytetar shqiptar”, shtoi ministri Balla në përfundim.