Ministri i Mbrojtjes, Niko Peleshi, ka dhënë detajet e fundit në lidhje me situatën me zjarret në vend. Në një postim në rrjetet sociale, ai njoftoi se gjatë ditës së sotme janë aktive 7 vatra zjarri në të gjithë territorin. Sipas tij, situata më problematike është në fshatin Pregj-Lurë të bashkisë Dibër, ku po punohet për fikjen e zjarrit që ka përfshirë një sipërfaqe me pisha të rralla dhe barishte.

Postimi i plotë:

“Sipas të dhënave nga Qendra Kombëtare Operacionale e Emergjencave Civile, gjatë ditës së sotme janë aktive 7 vatra zjarri në territorin e vendit. Forcat operacionale, nën koordinimin e Agjencisë Kombëtare të Mbrojtjes Civile, vijojnë punën në fshatin Madhesh të bashkisë Mat, ku zjarri i rënë prej datës 16 korrik është nën kontroll. Situata më problematike është në fshatin Pregj-Lurë të bashkisë Dibër, ku po punohet për fikjen e zjarrit në një sipërfaqe me pisha të rralla dhe barishte. Helikopteri i Forcave të Armatosura iu bashkua këtij operacioni mëngjesin e sotëm për të mos lejuar që flakët, të ndihmuara nga era, të përhapen drejt fshatit.

Mëngjesin e sotëm u raportua një vatër zjarri në një sipërfaqe me shkurre dhe ferra në fshatin Rras dhe një tjetër në fshatin Kuzhnen të bashkisë Pukë. Forcat e emergjencave po punojnë për shuarjen e tyre. Po punohet gjithashtu për shuarjen e zjarrit në fshatin Sakat të bashkisë Fushë-Arrëzit, në një sipërfaqe pyjore me pishë të zezë dhe lis, ku vatra u riaktivizua. Forcat zjarrfikëse janë në aksion për shuarjen e zjarrit edhe në vendin e quajtur ‘Shkëmbi i Hoxhës’ në bashkinë e Kolonjës, ku ka rënë zjarr në një sipërfaqe me shkurre dhe barishte. Ndërkaq, puna vijon për shuarjen e një tjetër vatre në lagjen ‘Granicë’ të bashkisë Gjirokastër dhe në fshatin Progonat të bashkisë Tepelenë, ku ka rënë zjarr në afërsi të varrezave publike. Në vendngjarje për shuarjen e zjarrit kanë shkuar shërbimi vendor i MZSH të bashkisë Tepelenë, të cilët po punojnë për shuarjen e tij.”