Ministri i Mbrojtjes, Pirro Vëngu, në një postim në rrjetet sociale, ka bërë me dije se situata nga zjarret në vendin tonë vazhdon të jetë e rënduar, por përpjekjet për të kontrolluar përhapjen e flakëve po japin rezultate. Vëngu ka vizituar nga afër situatën në Bashkinë e Selenicës dhe ka raportuar se pas një nate të tërë përpjekjesh, strukturat operacionale të Emergjencave Civile, në nivel lokal dhe qendror, kanë arritur të vënë nën kontroll vatrat e zjarrit në këtë zonë.
Në postimin e tij, Vëngu thekson se rreziku për banesat është eliminuar, megjithatë, situata do të mbetet nën monitorim të vazhdueshëm. Ai gjithashtu njofton se në ndihmë të forcave vendore janë bashkuar dy ekipe zjarrfikësish nga Forcat e Armatosura.
“Pas një nate përpjekjesh e pune të pandërprerë, strukturat operacionale të Emergjencave Civile në nivel lokal dhe qendror, nën koordinimin e Agjencisë Kombëtare të Mbrojtjes Civile, kanë arritur të vënë nën kontroll vatrat e zjarrit në bashkinë e Selenicës. Rreziku për banesat është eliminuar, por situata mbetet nën monitorim të vazhdueshëm. Në ndihmë të forcave vendore janë bashkuar edhe dy ekipe zjarrfikësish nga Forcat e Armatosura. Mirënjohje të gjithë efektivëve për punën e tyre heroike në mbrojtje të jetës dhe pronës së qytetarëve,” shkruan ministri Vëngu në postimin e tij.
#TëGatshëmNëÇdoKohë
