Ministri për Evropën dhe Punët e Jashtme, Igli Hasani, ka reaguar pas aksidentit të ndodhur mëngjesin e djeshëm, ku një automjet që lëvizte me shpejtësi përplasi dhe plagosi rëndë një punonjës të Ministrisë, ndërsa ky i fundit ishte duke kaluar në vijat e bardha, pranë godinës së institucionit.

Në një postim në rrjetet sociale, ministri Hasani shprehu mirënjohje për Urgjencën Kombëtare, Spitalin e Traumës dhe Policinë e Shtetit për reagimin e shpejtë dhe profesionalizmin e treguar.

“Shpreh mirënjohjen time për Urgjencën Kombëtare, Spitalin e Traumës dhe Policinë e Shtetit për gatishmërinë dhe profesionalizmin e treguar në reagimin ndaj aksidentit të ndodhur pak orë më parë, ku një koleg i yni u përplas nga një automjet ndërsa po kalonte rrugën pranë Ministrisë për Evropën dhe Punët e Jashtme,” – shkruan Hasani.

Ai informoi gjithashtu se punonjësi është jashtë rrezikut për jetën, ndodhet në gjendje të qëndrueshme dhe është nën kujdesin e mjekëve në Spitalin e Traumës.

Ndërkohë, policia ka shoqëruar drejtuesin e mjetit, ndërsa vijojnë hetimet për zbardhjen e plotë të rrethanave të aksidentit. Emri i të plagosurit nuk është bërë publik.