Konsumi i verës në mbarë botën ra ndjeshëm gjatë vitit 2024, duke zbritur në 214.2 milion hektolitra, niveli më i ulët që nga viti 1961, sipas një raporti të publikuar nga Organizata Ndërkombëtare e Hardhisë dhe Verës (OIV). Rënia vjetore prej 3.3% ka ngritur shqetësime në industrinë globale të verës, e cila tashmë përballet me sfida të shumta – nga ndryshimet në zakonet e konsumatorëve, te ndikimet klimatike dhe tarifat tregtare të Shteteve të Bashkuara.

Përveç konsumit, edhe prodhimi global ra me 4.8%, duke arritur në 225.8 milion hektolitra – gjithashtu niveli më i ulët në më shumë se 60 vjet. Sipas shefit të statistikave të OIV, Giorgio Delgrosso, industria po përballet me një “stuhi të përsosur” që përfshin shqetësime shëndetësore, çmime në rritje, ndryshime në preferencat e brezit të ri, si dhe ndikimin e ekstremeve mjedisore në vreshtari.

“Përtej krizave ekonomike dhe tensioneve gjeopolitike afatshkurtra, është jetike të analizohen faktorët strukturorë afatgjatë që po ndikojnë në këtë rënie të qëndrueshme të konsumit”, thuhet në raportin e OIV.

Europa në qendër të rënies

Europa, që përfaqëson gati gjysmën e konsumit global, raportoi një rënie mesatare prej 2.8% në konsum. Në Francë, konsumi zbriti me 3.6%, ndërsa Spanja dhe Portugalia ishin ndër të paktat tregje ku u regjistrua rritje e konsumit. Kina, dikur një treg në rritje për verën, vazhdon të qëndrojë nën nivelet para-pandemike.

Prodhimi dhe eksportet: Italia udhëheq botën

Italia mbetet prodhuesi dhe eksportuesi më i madh global i verës me 44 milion hektolitra, ndërsa Franca pësoi një rënie drastike prej 23%, duke prodhuar vetëm 36.1 milion hektolitra, niveli më i ulët që nga viti 1957. Spanja qëndroi në vend të tretë me 31 milion hektolitra.

Në Shtetet e Bashkuara, prodhimi ra me 17.2%, duke arritur në 21.1 milion hektolitra, kryesisht për shkak të temperaturave ekstreme, që kanë prekur ndjeshëm Kaliforninë – zonën më të rëndësishme të vreshtarisë në vend.

Megjithë krizën, verërat e gazuara si Prosecco vazhdojnë të performojnë mirë në tregjet ndërkombëtare, duke ofruar një dritë shprese për sektorin.

OIV paralajmëron se ristrukturimi i industrisë është i domosdoshëm, për të përballuar sfidat strukturore dhe për të rilidhur konsumatorët e rinj me kulturën e verës në një mënyrë të qëndrueshme dhe inovative.