Ministri i Mjedisit, Sofjan Jaupaj, deklaroi sot përmbylljen e fazës së parë të reformës së menaxhimit të mbetjeve, duke bërë të ditur se të gjitha projektet e planifikuara do të nisin zbatimin në vitin 2027.

Gjatë një konference për shtyp, Jaupaj theksoi se projektet janë hartuar në bashkëpunim me qeverinë gjermane, franceze dhe Komisionin Europian, ndërsa financimi është siguruar përmes marrëveshjeve bilaterale dhe fondeve të BE-së.

Sipas ministrit, reforma parashikon:
• zgjerimin e 4 landfilleve rajonalë;
• ndërtimin e 7 landfilleve të rinj rajonalë;
• ndërtimin e 17 stacioneve të transferimit;
• 10 stacione rikuperimi mbetjesh;
• 5 qendra kompostimi në bashki me karakter bujqësor;
• rehabilitimin e 49 vendedepozitimeve ilegale në të gjithë vendin.

Duke u ndalur te zonat problematike, Jaupaj bëri me dije se Sharra, Fieri dhe Elbasani përfaqësojnë rreth 65% të mbetjeve urbane në Shqipëri, ndaj për këto zona ka nisur bashkëpunimi me partnerët francezë për studime fizibiliteti. Deri në fund të vitit pritet të përfundojë dokumentacioni ligjor, teknik dhe financiar për mënyrën e menaxhimit të tyre.

Ministri njoftoi gjithashtu mbështetje për bashkitë në aspektin logjistik, ku gjatë këtij viti do të shpërndahen 5 mijë kontejnerë mbetjesh për zonat Berat, Tiranë–Durrës dhe Dibër, si dhe do të nisë ndarja e mbetjeve në burim.

Në kuadër të reformave ligjore, Jaupaj deklaroi se Ministria po punon për integrimin e përgjegjësisë mjedisore në Kodin e ri Penal, ndërsa në fund të shkurtit do të prezantohet edhe paketa e cilësisë së ajrit, që përfshin strategjinë kombëtare, ligjin e ri dhe aktet nënligjore për zbatim.