Atentati i ndodhur më 30 tetor në Dobraç të Shkodrës, ku humbën jetën katër persona, ka lënë shumë pyetje pa përgjigje. Dy prej viktimave, Flutura dhe Bashkim Basha, ishin qytetarë që ndodheshin rastësisht në atë segment, ndërsa dy të tjerët, Hamza Licin dhe Arlind Bushati, mendohet se ishin shënjestrat e atentatit.

Ndërsa hetimet për autorët dhe porositësit e këtij krimi të rëndë vazhdojnë, mister mbetet edhe identiteti i personit të tretë që dyshohet të ketë qenë në mjetin e viktimave. Sipas informacioneve, dyshohet se Ibrahim Lici, vëllai i Hamzait dhe një emër i njohur në botën e krimit, mund të ketë qenë aty, pasi një djalë i ri me ngjashmëri të dukshme me të u pa pranë trupit të pajetë të Hamzait në pamjet e vendit të ngjarjes. Ky dyshim, megjithatë, nuk është konfirmuar ende nga policia dhe prokuroria.

Përveç hetimeve për identifikimin e autorëve, policia ka nisur kontrolle edhe në spitale dhe klinika private në Shkodër dhe në qytete të tjera, për të identifikuar personin e tretë që dyshohet se ka mbetur i plagosur në atentat. Ekspertiza e mjetit të viktimave ka zbuluar tre telefona, tre pistoleta, disa gëzhoja dhe gjurmë gjaku që ende nuk janë identifikuar si të cilit person i përkasin, duke sugjeruar mundësinë që ka pasur dhe kundërsulm nga ana e viktimave. Hetimet vazhdojnë për të zbardhur këtë ngjarje misterioze.