Një ngjarje e rëndë është shënuar në autostradën “Tiranë–Durrës”, ku ka ndërruar jetë efektivi i Policisë së Shtetit, Eduart Biba, 45 vjeç.

Sipas njoftimit zyrtar të Policisë, Biba ka pësuar një arrest kardiak gjatë drejtimit të automjetit, duke humbur kontrollin e mjetit. Si pasojë, ai ka ndërruar jetë në vendngjarje, pavarësisht ndërhyrjes së menjëhershme.

45-vjeçari, me origjinë nga Kodër Rrësheni, mbante detyrën e Shefit të Seksionit të Krimeve në DVP Durrës, ku jetonte prej disa kohësh me familjen e tij. Gjatë karrierës, ai ka shërbyer edhe në Policinë e Lezhës dhe Mirditës, duke u vlerësuar nga kolegët për profesionalizmin dhe përkushtimin në detyrë.

Lajmi i ndarjes së tij të parakohshme nga jeta ka shkaktuar tronditje të thellë te familjarët, miqtë dhe kolegët, të cilët kanë shprehur ngushëllime dhe respekt për figurën e tij si oficer policie dhe si njeri.