Ish-deputeti i Partisë Socialiste, Andis Harasani, ka ndërruar jetë sot në moshën 54-vjeçare, pas një sëmundjeje të rëndë që e mundonte prej dy vitesh. Lajmin e hidhur e ka shpërndarë miku i tij, Agim Muço, përmes një postimi në rrjetet sociale.

Muço ka ndarë kujtime nga miqësia e tij me Harasanin, duke e përshkruar si një student inteligjent dhe një bashkëpunëtor të shkëlqyer. “Andisin e kam njohur kur e kisha student në Fakultetin Ekonomik. Ishte vërtetë një student inteligjent. Më pas punuam bashkë te Deloitte&Touche Tirana. Ishte një tirons i omël por dhe djalë i zoti,” ka shkruar Muço.

Andis Harasani ka shërbyer si deputet i PS-së në dy mandate, në vitet 2005 dhe 2009, dhe ka qenë drejtori i Korporatës Elektroenergjetike Shqiptare (KESH) nga shtatori i vitit 2002 deri në korrik 2005. Në vitin 2012, ai dha dorëheqjen nga mandati i deputetit dhe u shpërngul në SHBA, por nuk e ndërpreu aktivitetin e tij publik, duke kritikuar ashpër qeverinë e Edi Ramës përmes rrjeteve sociale.