Athinë, 25 Janar 2025 – Kryepeshkopi i Tiranës, Durrësit dhe gjithë Shqipërisë, Fortlumturia e Tij, Anastas Janullatos, është ndarë nga jeta mëngjesin e sotëm në moshën 95-vjeçare në spitalin “Evangelismos” në Athinë.

Kryepeshkopi Anastas ishte shtruar në spital prej disa javësh, pas përkeqësimit të shëndetit të tij, ndërsa gjatë ditëve të fundit ai ishte në gjendje të rënduar. Kisha Orthodhokse Autoqefale e Shqipërisë njoftoi se ai ndërroi jetë si pasojë e funksionimit të pamjaftueshëm të shumë organeve.

Një jetë e përkushtuar ndaj ringritjes së Kishës Orthodhokse Shqiptare

Fortlumturia e Tij, Kryepeshkopi Anastas, do të mbahet mend si rindërtuesi dhe rigjallëruesi i Kishës Orthodhokse Autoqefale të Shqipërisë pas rënies së regjimit komunist. Ai udhëhoqi ringritjen nga rrënojat, duke ndërtuar qindra kisha, institucione arsimore dhe bamirëse, si dhe duke formuar një brez të ri klerikësh.

Shërbimi i tij në Shqipëri zgjati më shumë se 33 vjet, gjatë të cilave ai punoi për forcimin e besimit, dialogun ndërfetar dhe afrimin e Kishës Shqiptare me botën orthodhokse.

Kisha Orthodhokse Autoqefale e Shqipërisë u ka bërë thirrje besimtarëve të luten për prehjen e shpirtit të Kryebariut të ndjerë.

Detajet mbi ceremoninë mortore priten të bëhen publike në vijim.