Tiranë, 25 Janar 2025 – Policia e Tiranës ka arrestuar një person dhe ka shpallur një tjetër në kërkim në kuadër të hetimeve për vrasjen e postierit Lulzim Visha, krim i ndodhur mëngjesin e 24 Janarit në Zall Mner të Kamzës.
I ndaluari, identiteti i të cilit nuk bëhet i ditur, u kap gjatë kontrolleve në zonën e Kamzës për armëmbajtje pa leje, ndërsa dyshohet edhe për përfshirje në atentatin ndaj 48-vjeçarit Lulzim Visha, i cili u ekzekutua me të paktën 12 plumba teksa ndodhej në automjetin e punës.
Operacioni policor “Silenciatori”
Policia ka zhvilluar operacionin e koduar “Silenciatori”, në kuadër të të cilit është arrestuar në flagrancë shtetasi E.L., 37 vjeç, banues në Kamëz, si dhe është shpallur në kërkim një tjetër shtetas E.L., 31 vjeç.
Gjatë kontrolleve në banesën e tyre në Zall Mner, u sekuestruan:
•Një armë zjarri automatike me silenciator
•15 fishekë luftarak
•Një sopatë dhe një thikë
•Një këllëf pistolete Glock
•4 gëzhoja armësh të gjetura në oborrin e banesës
Arma dhe gëzhojat janë dërguar në Institutin e Policisë Shkencore për të verifikuar nëse janë përdorur në këtë apo ngjarje të tjera kriminale.
Hetimet e policisë janë përqendruar në pistën e një konflikti të mëparshëm që viktima dhe vëllai i tij kishin pasur kohët e fundit.
Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.
