Shoferi i ambulancës së spitalit të Vlorës, i cili transportoi drejt morgut trupin e pajetë të Eraldo Novruzit, është ndaluar nga policia. 62-vjeçari me inicialet A. I., akuzohet se ka filmuar trupin e pajetë të 31-vjeçarit dhe më pas ia ka dërguar burimeve mediatike me qëllim publikimin.
Sipas njoftimit të policisë, grupi hetimor i është kërkuar shoferit të ambulancës të paraqesë celularin e tij për të verifikuar informacionin. Pasi u konstatua se ai kishte pamje filmike të trupit të pajetë, ai u ndalua për veprën penale “Zbulimi i akteve dhe të dhënave sekrete”.
Njoftimi i policisë:
“Në vijim të veprimeve hetimore për dokumentimin e plotë ligjor të vrasjes së shtetasit E. N., grupi hetimor ka marrë informacion se shoferi i autoambulancës që po transportonte trupin e pajetë për në morgun e Vlorës, kishte filmuar me celular trupin për t’ua dërguar burimeve mediatike me qëllim publikimin.
Bazuar në këtë informacion, shtetasit A. I., 62 vjeç, me detyrë shofer i ambulancës së morgut, i është bërë këqyrja e aparatit celular nga grupi hetimor, ku u konstatua se kishte pamje filmike të trupit të shtetasit E. N., të cilat ia kishte dërguar burimeve mediatike me qëllim publikimin.
Në vijim të veprimeve, u bë ndalimi i shtetasit A. I., 62 vjeç, me detyrë shofer i ambulancës së morgut Vlorë, për veprën penale “Zbulimi i akteve dhe të dhënave sekrete”.
Drejtoria Vendore e Policisë Vlorë falënderon gazetarët që nuk pranuan të publikonin videon e dërguar nga ky shtetas të trupit të pajetë të shtetasit E. N.
